ግንቦት ፲፰ ቀን ፳፻፲፮ ዓ.ም.
EOTC CPANA09182106

በስመ አብ ወወልድ ወመንፈስ ቅዱስ አሐዱ አምላክ አሜን

“ወይእዜኒ ዕቀቡ ርእሰክሙ ወኲሎ መራዕየ ዘሎቱ ሤመክሙ መንፈስ ቅዱስ ጳጳሳተ ከም ትርዐዩ ቤተ ክርስቲያኑ ለክርስቶስ እንተ አጥረያ በድሙ”

“በገዛ ደሙ የዋጃትን የእግዚአብሔርን ቤተ ክርስቲያን ትጠብቁአት ዘንድ መንፈስ ቅዱስ እናንተን ጳጳሳት አድርጎ ለሾመባት ለመንጋው ሁሉና ለራሳችሁ ተጠንቀቁ።” የሐዋርያት ሥራ ፳ ፥ ፳፰

በኢትዮጵያ ኦርቶዶክስ ተዋሕዶ ቤተ ክርስቲያን ለቅዱስ ሲኖዶስ አባላት በሙሉ

በሰሜን አሜሪካ የኢትዮጵያ ኦርቶዶክስ ተዋሕዶ ቤተ ክርስቲያን የካህናት እና ምዕመናን ኅብረት በሀገራችን ኢትዮጵያና በቤተ ክርስቲያናችን ላይ የተለያዩ ፈተናዎች ሲከሰቱ በኛ በኩል ልናደርግ ይገባል ብለን ያመንበትን ኃሳብ ስናቀርብ ቆይተናል። ችግሩም ከዕለት ወደ ዕለት እየሰፋ መምጣቱን ተከትሎ ያለብንን መንፈሳዊና ሃይማኖታዊ ግዴታ ለመወጣት እንድንችል በጥምረት ሆነን የተቻለንን ሁሉ በማድረግ ላይ እንገኛለን።

ከሀገር ርቀን የምንገኝ ካህናትና ምዕመናን ብንሆንም በየወቅቱ ቤተ ክርስቲያን ላይ የሚደርሰው መከራና ሰቆቃ በእኛ ላይ እንደ ደረሰ ያለ መሆኑን እያሰብን ለቤተ ክርስቲያንና ለወገኖቻችን በውጭው ዓለም ድምጽ ለመሆን እየሰራን እንገኛለን።

ከዚህ በፊት ከተደረጉ ተግባራት መካከል በጥቂቱ ለመግለጽ፦

1ኛ/ ለአሜሪካ መንግሥት የውጭ ጉዳይ ሚንስትር በሀገራችን እና በቤተ ክርስቲያናችን ላይ እየተደረገ ያለውን ተጨባጭ ሁኔታ በሰላማዊ ሰልፍ ወጥተን ግንዛቤ አስጨብጠናል።

2ኛ/ ጥር 14 ቀን 2014 ዓ.ም የተደረገው የጫካ ሲኖዶስ ሕገ ወጥ ሲመት በሀገራችን እና በቤተ ክርስቲያናችን ላይ ሊያስከትል የሚችለውን አደጋ ከግምት ውስጥ በማስገባት በአሜሪካ ዋና ከተማ እንደመኖራችን በዋይት ኃውስ ቤተ መንግሥት አደባባይ ቀርበን የተጋረጠውን አደጋ በማስረዳት ኃላፊነት የሚሰማቸው አካላት ሁሉ ለጉዳዩ ትኩረት እንዲሰጡ በተደጋጋሚ አሳስበናል።

3ኛ/ በአሜሪካ ውጭ ጉዳይ ሚኒስትር ለአፍሪካ ጉዳዮች ኮሚቴ የኢትዮጵያ መንግሥት በሀገራችን ፤ በሕዝባችን እና በቤተ ክርስቲያናችን ላይ እየፈጸመ ያለውን የሰብዓዊ መብት ጥሰት ፤ የሃይማኖት ጣልቃ ገብነት፤ በሲኖዶሱ ውስጥ እያደረገ ያለውን መከፋፋል  እንዲያቆም በሰላማዊ ሰልፍ እና በደብዳቤ ጠይቀን የጽሑፍ መልስ አግተናል።

ብፁዓን አበው ሊቃነ ጳጳሳት ፦

ከላይ በመግቢያ የዘረዘርነው ነጥብ ከታሪክ ተወቃሽነት ራሳችሁን እና ቤተ ክርስቲያናችሁን እንድትታደጉ የበኩላችሁ ጥረት እንድታደርጉ ለመማጸን ነው እንጂ እየሆነ ያለው ነገር ከናንተ የተሰወረ እንዳልሆነ እንረዳለን፡፡

በአሁኑ ሰዓት በውስጥም በውጭም በተደራጁ አካላት በቤተ ክርስቲያናችን ላይ የታቀደውን የማፈራረስ ሴራ አላወቅንም ፤ ያሳሰበን የለም ፤ ችግሩን የፈጠሩት  እነ እገሌ ናቸው ብሎ የሚታለፍ እንዳልሆነና ፤ በዘመናችሁ አሳዛኝ እና አስከፊ የታሪክ ጠባሳ ጥላችሁ እንዳታልፉ፤ ደማቸው በከንቱ በግፍ እየፈሰሰ ያለውን የወገኖቻችን መከራ ለአፍታ በዐይነ ሕሊናችሁ ትዝ እንዲላችሁ፤ እኛም ከሕሊና ወቀሳ ነጻ እንድንሆን ፤ አስቀድመን የተሰማንን ኃሳብ መግለጽ አስፈላጊ ስለሆነ ነው።

በዚህ መነሻነት በዘንድሮው 2016 ዓ.ም  ርክበ ካህናት  የቅዱስ ሲኖዶስ ስብሰባ ብፁዓን አበው ሊቃነ ጳጳሳት  በቅድስት ቤተ ክርስቲያን ላይ እየመጣ ያለውን  እጅግ ከባድ እና አስፈሪ ፈተና በጥብዓት ማለፍ ትችሉ ዘንድ ለቅዱስ ሲኖዶስ አባላትና በመላው ዓለም የሚኖሩ ኢትዮጵያውያን በሙሉ ኃሳባችንን እንዲጋሩን የሚከተለውን የአቁም መግለጫ አውጥተናል፡፡

የአቁም መግለጫ

1ኛ/ መጪው ዘመን እና ጊዜ ለቅድስት ቤተ ክርስቲያን እጅግ ፈታኝ አስፈሪ በመሆኑ በርካቶች የቅድስት ቤተ ክርስቲያን አባላት መንግሥትና ቅጥረኞቹ ባቀዱትና በሸረቡት ሀገርንና ቤተ ክርስቲያንን የማፈራረስ ፤ በጎጥ የመከፋፈል ዕቅድ አስፈጻሚ እንዳትሆኑ ፤ መጭውን ጊዜ አባቶቻችን በጸሎት እና በጽሞና እንድታሳልፉ በአክብሮት እንጠይቃለን፤

አንዳንድ የቅዱስ ሲኖዶስ አባላት ቅድስት ቤተ ክርስቲያንን ለሥልጣንና ለጥቅም አሳልፎ በመስጠት ታሪካዊ ስህተት በመሥራት እና ኃላፊነታቸውን ባለመወጣት ከእግዚአብሔር ለተቀበሉት አደራ በምንደኛነት ተሰልፈው እናያቸዋለን፣ አብዛኛው የቅዱስ ሲኖዶስ አባላት ግን ከዚህ አሉታዊ ተግባር እንድትቆጠቡ በልጅነት ጥያቄያችንን እናቀርባለን። ከሐዋርያት የተቀበልናትን ቅድስት ቤተክርስቲያን ትጠብቋት ዘንድ ከእግረ መስቀላችሁ ሥራ ወድቀን እንጠይቃለን።

2ኛ/ የቅዱስ ሲኖዶስ ዋና ጸሐፊው በግፍ ወደ ሃገራቸው እንዳይገቡ ሲደረገ፣ በዚህ ሰሞን ደግሞ ሌሎች ብፁዓን አባቶች በቅርቡ ወደ ሃገር ለርክበ ካህናት የቅዱስ ሲኖዶስ ጉባኤ ለመሳተፍ ሲመጡ እንዳይገቡ ሲከለከሉ፤ ቅዱስ ሲኖዶስ አሁንም በዝምታው ጸንቷል፤ በመሆኑም ይህ ድርጊት በአስቸኳይ ካልቆመ ቤተ ክርስቲያኒቱን የማዳከም እንቅስቃሴ ስለሚጨምር በአስቸኳይ የቅዱስ ሲኖዶስ ጸሐፊውም ሆነ ሌሎች አባቶች ወደ ሃገራቸው መግባት እንዲችሉ የሚመለከተው አካል ግፊት እንዲያደርግ እንጠይቃለን።

3ኛ/ ጠቅላይ ሚኒስቴሩ ቅዱስ ፓትርያርኩ እና  ብፁዓን አበው ሊቃነ ጳጳሳትን በቢሯቸው ጠርተው ሲያነጋግሩ ካነሱት ነጥብ “ቤተክርስቲያን የነፍሰ ገዳይ ማሰልጠኛ ሆናለች” “ከእናንተ ውስጥ ገንዘብ የማይቀበል አለ ብዬ አላምንም” የሚሉና ሌሎችም የቤተ ክርስቲያናችንን ክብር የሚያጎድፉ ፤  ሃይማኖቷን የሚያሳንሱ እጅግ ጸያፍ ክብረ ነክ የሆነ ነገር በስብሰባ ላይ ሲናገሩ ሰምተናል፡፡ በዕለቱ ምንም መልስ ወይም ማብራሪያ እንደማይቀበሉ ይታወቃል፤ ነገር ግን በቤተ ክርስቲያን ሚዲያ ወይንም በሌሎች ሚዲያዎች በመጠቀም፤

·         ቤተ ክርስቲያን የድኅነት ቦታ እንጂ የወታደር ማሰልጠኛ አለመሆኗን በጠቅላዩ የተባለው ፍጹም ስህተት መሆኑን፤

·         የቅዱስ ሲኖዶስም አባላት በገንዘብ የሚገዙ ወንጀለኞች ናችሁ ብሎ ቅዱስ ፓትርያርኩን ጨምሮ የተነገረው እጅግ ስህተት መሆኑን፤

·         በአገዛዙ የተመለመሉ፤ በካድሬነት የተሰማሩ ፤ የክህነት መልክ ያላቸው ተወካዮች ነን ባዮች፤ መንግሥትን ለምን የራስህን ፓትርያርክ አትመርጥም በማለት የተናገሩትን ቤተ ክርስቲያኗን አሳልፈው የሰጡትን አባት ተብዬዎች ለአማኙ ሕዝብ በማሳወቅ ቀጣዩን ፈተና በጥንቃቄ ለመወጣት ጥረት እንዲደረግ እንጠይቃል።

4ኛ/ አረጋዊው አባት ብፁዕ አቡነ ሉቃስ እውነትን ስለተናገሩ በመንግሥት ሲከሰሱ ሌሎች የቅዱስ ሲኖዶስ አባላት ከብፁዕነታቸው ጎን መቆም ሲገባቸው በአብዛኛው ዝምታን መርጠዋል፤ ጥቂት አባቶች ደግሞ ግፍ ከሚፈጽመው አካል ጎን ቆመው ብፁዕነታቸውን መዝለፋቸው ሳያንስ በመጪው ርክበ ካህናት ላይ ብፁዕነታቸውን ለማስወገዝ ከጌቶቻቸው በተቀበሉት ተልዕኮ ጠዋት እና ማታ ሲሮጦ በማየታችን እጅግ አዝነናል፤ ቅዱስ ሲኖዶስ በብፁዕነታቸው ላይ ምንም አይነት እርምጃ ከወሰደ በቤተ ክርስቲያኒቱ ውስጥ ትልቅ ክፍፍል ስለሚፈጥር ጉዳዩን በጥንቃቄ እንዲይዘው እያሳሰብን በብፁዕነታቸው ላይ የተከፈተውን የወንጀል ክስ እንዲያስቆም እና ከብፁዕነታቸው ጎን እንዲቆም እንጠይቃለን።

5ኛ/  በተለያዩ የሀገራችን ክፍል በተለይ በአርሲ አካባቢ በመንግሥት አካላት የሚገደሉት፣ የሚታረዱት ብሎም የሚቃጠሉትን አብያተ ቤተ ክርሲቲያናት በተመለከተ ቅዱስ ሲኖዶስ ምንም አይነት የተቃውሞ ወይም ጥያቄ አለማቅረብ ማኅበረ ካህናትን እና ምዕመናንን በእጅጉ ያሳዘነ ተግባር ነው፤ ቅዱስ ሲኖዶስ በአስቸኳይ ጉዳዮችን አጣሪ ክፍል በማዘጋጀት  አስቸኳይ ምላሽ እና መግለጫ ወይም የሚመለከተውን አካል ትብብር የመጠየቅ ወይም የመከለካለ ሥራ እንዲሰራ የሚያደርግ አሰራር መቀየስ ወይም እንዲያስተባብር  እንጠይቃለን፡፡

6ኛ/ በጥር ፲፬ ቀን ፳፻፲ ዓ.ም. በጫካ የተደረገውን ሕገወጥ ሲመት ተከትሎ በሻሸመኔ በርካቶች ክቡር ሕይወታቸውን ሰውተዋል፣ ያንን ተከትሎ ጥቁር በመልበስ ዘመቻው ከሥራቸው የተፈናቀሉ፣ እስከ አሁን በእስር ላይ የሚገኙ ክርስቲያኖች በምን ሁኔታ እንዳሉ የቅዱስ ሲኖዶስ ሥራ አስኪያጅ ወይም ጸሐፊ ወይም በየደረጃው ያሉ የሥራ ኃላፊዎች ክትትል በማድረግ የማጽናናት፣ ወይም ለማስፈታት የተደረገ  ሙከራ ካለ መልካም ከሌለ ግን እኛንም በእጅጉ እያሳዘነን ስለሆነ ቅዱስ ሲኖዶስ በአጀንዳ ተወያይቶ ለሚመለከተው አካል ጥያቄ በማቅረብ የሚደርስበትን ውጤት በይፋ እንዲገልጽልን በአክብሮት እንጠይቃለን።

7ኛ/ የኢትዮጵያ ኦርቶዶክስ ተዋሕዶ ቤተ ክርስቲያን እንጀራዋን በልተው መውጫ መግቢያውን በሚያውቁ የውስጥ እና የውጭ ጠላቶቿ በቅንጅት ለማፍረስ የሚደረገውን ርብርብ ቅዱስ ሲኖዶስ ሕገ እግዚአብሔርን፣ ሕገ ቤተ ክርስቲያንን መሠረት አድርጎ ከምንም በላይ አንድነቱን፣ ማዕከላዊ የመዋቅር አደረጃጀቱን እና ሉዓላዊነቱን አስጠብቆ  በዚህ  የግንቦት 2016 ዓ.ም ርክበ ካህናት ጉባኤ ኃላፊነቱን እንዲወጣ አጥብቀን እንጠይቃለን።      

8ኛ/ ሰሞኑን በማኅበራዊ ሚዲያው ተሰራጭቶ የታየውና ጉዳይም ከሚመለከታቸው ጋር በተደረገው ማጣራት ሁለት ሊቃነ ጳጳሳት ማለትም  ብፁዕ አቡነ ቴዎፍሎስና አቡነ ያዕቆብ ወደ ሀገር ቤት እንዳይገቡ ከኢትዮጵያ አየር መንገድ የጉዙ ትኬታቸውን መሠረዙ ታውቋል። ይህ ሁሉ ቤተ ክርስቲያን አንድነቷን ለማሳጣት መንግሥት የሚያደርገው የመከፋፈል ሤራ በመሆኑ እየተቃወምን ቅዱስ ሲኖዶስ አጠቃላይ መፍትሄ እንዲያስቀምጥ እንጠይቃለን፤

9ኛ/  በመላው ዓለም ላይ ያለን ካህናት እና ምዕመናን ሁላችንም በቤተ ክርስቲያናችንና በገዳማቱ ፣ በአብነት ትምህርት ቤቶቻችንና ታሪካው የቅድስና ሥፍራዎችን በማጥፋት ሕዝበ ክርስቲያኑን በመጨፍጨፍ ሊቃውንቱን በመግደል በተጠና ዕቅድ የብልጽግና መንግሥት የሚፈጽመውን የዘር ማጥፋት እንቃወማለን፡

10ኛ/ የዲሲ እና አካባቢው የካህናትና ምዕመናን ኅብረት የሰው ዘር ለተባለው ሁሉ ይልቁንም መከራው ለጸናበት ኦርቶዶክሳዊ ክርስቲያንን ከምድረ ገጽ ለማጥፋት ፤ አገራችንን ኢትዮጵያንም ለማፍራረስ የሚደረገውን ርብርብ እየተቃወምን ወገኖቻችንን  በምንችለው ሁሉ  ድጋፍ ለማድረግ እና ለማስተባበር ቅዱስ ሲኖዶሱም አንድነቱን ጠብቆ የመንደር ሲኖዶስን በማረቅ፤ በአቋሙ ጽንቶ ለሚያደርገው ጥረት ሁሉ ድጋፋችንን እናበረክታለን።      

 ማጠቃለያ

ብፁዓን አበው ሊቃነ ጳጳሳት፤-

 በአጠቃላይ በሀገራችን ኢትዮጵያ የሃይማኖት ነጻነት ከምድሪቱ እየጠፋ እንዳለ እና ቅዱስ ሲኖዶስም ምንም አይነት ጥያቄ አለማቅረብ፤ በተለይ መንግሥት የሚያደርገውን የሃይማኖት ጣልቃ ገብነት በዝምታ ማለፍ ተገቢ ባለመሆኑ ከላይ ከ1-10  የጠቀስናቸውን ነጥቦች ከግንዛቤ ውስጥ በመክተት በቅንነትና በማስተዋል ልትረዱት ይገባል ብለን እናምናለን፡፡ በተቃራኒው ለጥቅም ተገዝተው ኃላፊነታቸውን ዘንግተው ለአገዛዙ ወኪል በመሆን ለሚያስጨንቋችሁ ቡድኖች ወይም ካድሬዎች ቤተ ክርስቲያኗን አሳልፋችሁ በመስጠት ቤተ ክርስቲያኗን በማፍረስ ተልዕኮ ውስጥ በመሳተፍ ለምትወሰኑት ውሳኔዎች ሁሉ ከታሪክ ተወቃሽነት እንድትድኑ እና በመልካም ሥራ ሰርተው እንዳለፉት ሐዋርያት አባቶቻችሁ አሰረ ፍኖታቸውን ትከተሉ ዘንድ አስቀድመን እያሳሰብን እኛም እንዲህ ያለውን አካሄድ በመደገፍ አንድነታችንን አጠናክረን ከእውነተኞቹ ጎን በመቆም ማንኛውም መስዋዕትነት ለመክፈል ዝግጁ መሆናችንን በታላቅ ትህትና  እንገልጻለን።

                                 ብፁዓን አበው ሊቃነ ጳጳሳት ቡራኬያችሁ ይድረሰን!

                                      ከመንፈሳዊ ሰላምታ ጋር

                          እግዚአብሔር አምላክ ኢትዮጵያን እና ሕዝቧን በረደኤት ይጠብቅልን፤                   

ግንቦት 18 ቀን 2016 ዓ.ም

(May 26, 2024)   Washington DC

ግልባጭ

+ ለመንበረ ፓትርያርክ ልዩ ጽ/ቤት

+ ለጠቅላይ ቤተ ክህነት ጠቅላይ ሥራ አስኪያጅ

+ ለብፁዓን ሊቃነ ጳጳሳት በየአህጉረ ስብከታቸው

+ ለማኅበረ ቅዱሳን ሚዲያና ኦዲዮ ቪዡዋል ክፍል

+ በሰሜን አሜሪካ ለሚገኙ ማኅበራት በሙሉ